ಪ್ರಾರ್ಥನೆ

ಜೀವ ಉಳಿಸುವಷ್ಟು ಉಸಿರನ್ನು ಮಾತ್ರ ಕೊಡು
ಉಸಿರುಗಟ್ಟಿಸುವ ಸುಳಿಗಾಳಿಯಿಂದೆನ್ನ ರಕ್ಷಿಸು;
ಬಾಯಾರಿಕೆ ತೀರುವಷ್ಟು ನೀರನ್ನು ಮಾತ್ರ ಕೊಡು
ಮನುಕುಲವ ಮುಳುಗಿಸುವ ಪ್ರಳಯದಿಂದ ರಕ್ಷಿಸು;
ಹೊಟ್ಟೆಪಾಡಿಗೆ ಬೇಕಾದಷ್ಟು ದುಡ್ಡನ್ನು ಮಾತ್ರ ಕೊಡು
ಆತ್ಮವ ಕೊಲ್ಲುವ ಸಿರಿಸಂಪತ್ತುಗಳಿಂದ ರಕ್ಷಿಸು.

[ತೆಲುಗು ಮೂಲ: ಜಲಾಡಿ ರತ್ನ ಸುಧೀರ್]

ಡಿಮ್ಯಾಂಡ್

ಆಕಾಶದಲ್ಲಿ

ನನ್ನನ್ನು ಆಡಲು ಬಿಡಿ

ಪಾರಿವಾಳದಂತೆ ಹಾರಬೇಕು

ನನ್ನನ್ನು ತಡೆಯಬೇಡಿ.

ತಾರೆಗಳನ್ನು

ಎಣಿಸಲು ಬಿಡಿ

ನನ್ನ ದೇಶದಲ್ಲಿ

ಲಕ್ಷಗಟ್ಟಲೆ ಗುಡಿಸಲುಗಳು

ಕತ್ತಲಲ್ಲಿವೆ -

ಸಾಕಾಗಬಹುದೇನೋ

ಲೆಕ್ಕ ಹಾಕಲು ಬಿಡಿ.

ಬೆಳದಿಂಗಳೆಂದರೆ ನನಗೂ ಇಷ್ಟ

ಚಂದಮಾಮನನ್ನು

ಮುದ್ದಾಡುವಾಸೆ.

ಚಂದ್ರಮಂಡಲ ಉಳ್ಳವರ ಸ್ವತ್ತಾಗಬಾರದು.

ನನ್ನನ್ನೂ ಹೋಗಲು ಬಿಡಿ.

ಸೂರ್ಯನನ್ನು

ನನ್ನ ಮನೆಯೊಳಗೆ

ಮನದೊಳಗೆ

ಮೈಯೊಳಗೆ ಕರೆಯುವೆನು.

ಕ್ರೂರ ಮೃಗಗಳು ಅಡ್ಡನಿಂತಿವೆ

ಆಯುಧಗಳನ್ನು ಕೊಡಿ

ಕೊಚ್ಚಿ ಅವುಗಳನ್ನು

ಸೂರ್ಯನಿಗೆ ಸ್ವಾಗತ ಕೋರುವೆ.

[ತೆಲುಗು ಮೂಲ: ಸಿ. ಹೆಚ್. ಮಧು. ]

ಹನಿಗವನಗಳು

ಆಕೆಯೊಡನೆ

ಇಟ್ಟದ್ದು ಏಳು ಹೆಜ್ಜೆಗಳೇ

ಈಗ ದಾಟಿಸುತಿವೆ

ಸಪ್ತ ಸಾಗರಗಳ !

ಬಡಾಯಿ ಕೊಚ್ಕೋತೀವಿ

ಅನುವಾಗದ ಜಾಗದಲ್ಲೂ

ಬಾಳಿ ಬೆಳೆದದ್ದು

ಅಮ್ಮ, ಅವಳೊಬ್ಬಳೇ !

ಆಕೆ

ಎಷ್ಟು ಸಲ ಬೇಕಾದ್ರೂ

ಕ್ಷಮಿಸುವಳು !

ಇನ್ನು ನನ್ನ ತಪ್ಪುಗಳಿಗೇನು ಲೆಕ್ಕ ?